這是一个以地圖做基礎的台語友善空間平台，
整合會當使用台語點菜、予醫生看、參觀等等場所的資訊，
予使用者會當輕鬆瀏覽、篩選，閣會當自由加添店頭、留話拍分數佮分享。
倚靠社群力量，鼓勵閣較濟人參與，予台語友善空間四界生湠。
阮是一陣對台灣北、中、南部來的設計師佮創作者。佇國外求學的過程中，阮智覺著家己的英語能力竟然比家己的母語閣較輾轉矣。這予阮意識著，保存佮傳承自細漢佮阿公阿媽、爸母交流的時使用的這个自然兼好聽的語言，是偌爾仔重要的代誌。
自按呢，阮希望結合家己佇設計佮程式等等領域的所長，將各地會當自由使用台語交流的空間好好仔收集佮記錄，為這份語言文化鬥出力。
揤倒手爿「台語友善貼紙」就通下載列印檔案，歡迎自由使用。阮嘛提供貼紙予願意囥的店頭抑是空間，予民眾來提。
若準有任何想法、建議抑是合作機會，歡迎寄電批佮阮聯絡：[email protected]